ஜாதி - தீண்டாமைக்கு எதிரான பயணம் தொடங்கியது

ஜாதி, தீண்டாமைக்கு எதிராக பெரியார் திராவிடர் கழகம் புரட்சியாளர் அம்பேத்கர் பிறந்தநாளான 14.04. 2010 அன்று தமிழ்நாடு தழுவிய அளவில் நீண்ட நெடிய பரப்புரைப் பயணத்தை தேனி மாவட்டம் போடி நகரில் தொடங்கியது.


தேனி, திண்டுக்கல், திருச்சி, கருர், பெரம்பலூர், அரியலூர், கடலூர் மாவட்டங்களிலும் புதுச்சேரி மாநிலத்திலும் இப்பயணம் தொடர்ந்து செல்கிறது. மாநிலம் முழுவதிலும் இருந்து 30 தோழர்கள் இப்பயணத்தில் பங்கேற்றுள்ளார்கள்.


பெரியார் திராவிடர் கழகத் தலைவர் தோழர் கொளத்தூர் மணி தலைமையில் தொடரும் இப்பயணத்தை பொதுச் செயலாளர் விடுதலை.க.இராசேந்திரன் தொடங்கிவைத்து சிறப்புரையாற்றினார்.


கும்பகோணம் சிற்பி.இராசன் அவர்கள் இப்பயணம் முழுவதும் 30 நாட்களும் பங்கேற்று அனைத்து கிராமங்களிலும் மந்திரமா? தந்திரமா? எனும் அறிவியல் விளக்க நிகழ்ச்சியை நடத்துகிறார். சுமார் 3 இலட்ச ருபாய் அளவுக்கு திட்டமிடப்பட்டுத் தொடங்கப்பட்டுள்ள இப்பயணம் சிறப்பாக நடைபெற பதினைந்தாயிரம் ( 15000) ருபாயை நன்கொடையாக வழங்கினார். கும்பகோணம் வழக்கறிஞர் கீதாலயன் அவர்கள் பத்தாயிரம் (10000) ருபாயை நன்கொடையாக வழங்கியுள்ளார்கள். மீதத் தொகையை தோழர்கள் கூட்டங்களில் துண்டேந்தி திரட்டுகின்றனர்.


14.04.2010 அன்று போடி நகரில் தோழர்.க.சரவணன் நிகழ்ச்சிக்கான ஏற்பாடுகளைச் சிறப்பாகச் செய்திருந்தார். மதுரை மாவட்டப் பொறுப்பாளர்கள் முருகேசன், தமிழ்ப்பித்தன், திருப்பூர் இராவணன், பெரியகுளம் குமரேசன், தேனி முத்துப்பாண்டி ஆகிய தோழர்கள் தேனி மாவட்டம் முழுவதற்கும் உரிய முன்னேற்பாடுகளைச் செய்துவருகின்றனர்.


ஆதித்தமிழர் பேரவை மற்றும் தமிழ்ப்புலிகள் அமைப்புகளின் தோழர்கள்சிறந்த ஒத்துழைப்பைக் கொடுத்தனர். பயணத்தை தொடங்கி வைத்து உரையாற்றிய பொதுச்செயலாளர் விடுதலை.க.இராசேந்திரன் அவர்களுக்கு தமிழ்ப்புலிகள் அமைப்பின் மாவட்டப்பொறுப்பாளர் நாகராசன், ஆதித்தமிழர் பேரவையின் பொறுப்பாளர்கள் துணடு அணிவித்து வாழ்த்துத் தெரிவித்தனர்.


நிகழ்ச்சியில் தமிழ்நாட்டில் ஜாதி தீண்டாமைக் கொடுமைகள் - ஒரு கள ஆய்வு என்ற நூல் வெளியிடப்பட்டது. மதுரையில் இயங்கிவரும் எவிடன்ஸ் என்ற அமைப்பு தமிழக கிராமங்கள் மற்றும் நகரங்களில் இன்னும் தாண்டவமாடும் தீண்டமைக் கொடுமைகள் குறித்து நேரடியாக ஒரு ஆய்வை மேற்கொண்டு அறிக்கையைத் தயாரித்திருந்தது. அந்த அறிக்கையினை பெரியார் திராவிடர் கழகம் நூலாக அச்சிட்டு இப்பயணத்தின் தொடக்கப் பொதுக்கூட்டத்தில் வெளியிட்டது. விடுதலை.க.இராசேந்திரன் அவர்கள் நூலை வெளியிட்டார். திருப்பூர் மாவட்டத்தலைவர் துரைசாமி, போடி சரவணன், போடி நாகராசன் ஆகியோர் நூலைப் பெற்றுக்கொண்டனர். நாளைமுதல் தேனி மாவட்டத்தின் கிராமப்பகுதிகளில் பரப்புரை தொடர உள்ளது.


தேவாரம், உத்தமபாளையம், சின்னமனூர், கோடாங்கிபட்டி, தேனி ஆகிய பகுதிகளிலும் கூட்டங்களுக்கு ஏற்பாடுகள் செய்யப்பட்டுள்ளன. கடந்த சில ஆண்டுகளுக்கு முன்பு ஜாதிக் கலவரங்களால் கடுமையாகப் பாதிக்கப்பட்ட தேனி மாவட்டத்தின் கிராமப்பகுதிகளில் முதன் முறையாக எந்த சிக்கலும் இன்றி ஜாதி தீண்டாமை ஒழிப்புப்பிரச்சாரம் தொடங்கியுள்ளது குறிப்பிடத்தக்கதாகும்
-அதி அசுரன்